Euskal raparen eszena aberasten jarraituz, Odei Barrosok ostiral honetan aurkeztuko du bere azken lana, 'Goizegi hiltzeko', Miarritzeko Atabal aretoan. 20:00etan hasiko den kontzertu honetan, Urruñako artistak disko berriko 15 abestiak taularatuko ditu, publikoari bere proposamen musikal berria gerturatuz. Diskoa aurkezteko, "Nun da Wally?" izeneko aurrerapen bideoklipa kaleratu zuen otsailaren 9an, eta dagoeneko 1.400 ikustaldi baino gehiago lortu ditu YouTuben. 2zio taldearekin hiru disko argitaratu ondoren, 2022an bakarkako bidea hasi zuen Terapia diskoarekin. Lan horretan, "Terapia" eta "Zinez" abestiek 40.000 ikustaldi baino gehiago izan dituzte YouTuben. Ostiraleko kontzertua urririk da, baina beharrezkoa da aldez aurretik erreserba egitea Atabal aretoaren webgunean.

Nondik pasako da Garaziko desbideraketa? Ostegun arratsean, hirurehun pertsona bildu dira Izpurako Faustin Bentaberri gelan. Departamenduko eta tokiko hautetsiek aurkeztu dituzte herritarren kontsultaren modalitateak baina jendea galdera anitzekin itzuli da etxera, anitzen arabera «ez baitituzte xeheki aurkeztu» ibilbide proposamenak. Orain, herritarrek xehetasunak atzemanen dituzte herriko etxeetan eta hor horien iritzia ematen ahalko dute ekaina hastapenera arte. Hautetsiek buruilean eginen dute bilana.

Baionako ospitalean minbiziaren aurkako zentro berria estreinatu dute atzo. Orotara, 60 mediku zenbatzen ditu zentroak, eremu berezitu desberdinetan. Zentroak minbizia hobeki segitzeko, sendatzeko eta ikertzeko xedea du, Ipar Euskal Herrian ospitalizazioen laurdena minbiziarengatik egiten delarik. 2023an, 900 ebakuntza izan dira Ipar Euskal Herrian, minbiziaren ondorioz.

Euskara praktikatzeko, Mintzalagunak topatuko dira Baionan larunbatean. AEKk azken bi urte hauetan indartu nahi duen egitasmoa dira Mintzalagun taldeak. Klasetik kanpo euskararen trebatzeko bilzen diren euskaldun zahar eta berriak dira. Gaur egun Ipar Euskal Herrian 120 pertsona bilakatu dira mintzalagun. Larunbat honetan Baionan gaindi pista joko batean parte hartzen ahalko dute goizeko 10:00etatik goiti, eta ondotik bazkaria. Arratsaldean mago bat eta jokoak iraganen dira.

Bai Euskarari ziurtagiria ukan du Sarako herriko etxeak. Izan harreran, haurtzaroan, hirigintzan edota kulturan, zerbitzu oro euskaraz eskaintzen ditu herriko etxeak. Udaberri honetan, «Saran bizi ga eskuaraz!» kanpaina abiatuko dute, euskara egunerokoan denek erabiltzen hasteko gisan. Hori baino lehen, publikoa errezibitzen duten komertzio eta jendeer zuzendu bi tailer antolatuko dituzte apirilean Plazara kolektiboarekin, lehen hitza euskaraz emaiteko gisan.

Ostegun arratsaldean Izpurako Faustin Bentaberri gelan desbideraketari buruzko informazio bilkura antolatu du Departamenduak. 1950 hamarkadan hasi ziren Garaziko desbideraketaren lehen proiektuak. Hainbat proposamen eta eztabaida izan dira urte luze horietan baina nehoiz ez da gauzatu bide berriaren proiektua, eta duela bi urte, departamenduak kontzertazio lana berriz hasi zuen tokiko zortzi auzapezek osatu gidaritza batzordean. Bertan parte hartzen dute Donibane Garazik, Izpurak, Donazaharrek, Zarok, Azkaratek, Uharte Garazik, Lasak eta Eiheralarrek. Estudio batek hainbat proposamen egin ditu desbideraketaren ibilbideari begira, eta ostegun honetan aurkeztuko dituzte herritarren aitzinean. Herritarrek horien iritzia ematen ahalko dute herriko etxeetan, eta Gidaritza Batzordeak kontutan hartuko ditu ibilbide hoberenaren hautatzeko.

Euskalgintzak Senpereko Larraldea etxea faltan botako du. Uda gabe, Bertsularien lagunak, bertan gelditzen den azken elkarteak, lekuz aldatuko du eta etxea hetsiko dute. Euskararen, euskal kulturaren eta arteen ohantzea izan da Larraldea, urte luzetan, Andoni Iturrioz mezenasak sortutako burbuila berezia. Bertatik hamarnaka elkarte pasa ziren: Gastibeltza, Integrazio batzordea, Lapurdi 1609 elkartea edota Haur Rock. Andoni Iturriozek Larraldea bere haurrei transmititu die, eta beste xedeak dituzte leku horrentzat. Euskalgintza babestu duen leku bat galtzen du Ipar Euskal Herriak, horrenbestez.

«GAL: Au nom de la raison d'état» dokumentala aurkeztu du Sylvie Garat filma egileak. Espainiako Gobernuak 1980ko hamarkadan GAL taldearen bidez egindako gerra zikinaren inguruko ikerketa sakonaren emaitza da lan berria. Garatek hainbat biktima, militante abertzale, politikari eta funtzionario frantses elkarrizketatu ditu, baita bi aldeetako epaileak ere, gertakari haien konplexutasuna eta ondorioak argitzeko asmoz. Dokumentalak, 52 minutuko iraupena du, eta martxoaren 20an aurrestreinatuko dute Donibane Lohizuneko Le Select zinema aretoan. Ekoizpenak GALen jarduerak estali zituzten mekanismo politiko eta juridikoak aztertzen ditu, egia historikoa argitara ateratzeko asmoz.

Akotzeko auzoan, Lafitenia hondartzaren gainaldean itsasoak eta hondartzak osatzen duten zirkulu arkua begipean du goizero Baptiste D’Aleman musikariak. Gune horretan kanpin ohi batean den apartamendu bat alokatzen du 2016tik. Promotoreek kanpina erosi aitzin izenpetutako kontratu batek babesten du Baptiste D’Aleman eta hainbat helegiteren ondotik justiziak bere alde egin zuen. Baina 4 urteko bataila luzea izan dela erran digu: «Promotoreak nire usatzen saiatu dira iritsi ziren mementotik, egiazko gerla juridiko eta humanoa izan da. Nere egurra lapurtu didate, nire scootera. Gauaz etortzen zen gizon bat elektrika moztera, eta oihuka egitera, ni kanporatzeko». Baptiste D’Alemanek ez du inoiz bortizki erantzun. Sekulan ez du berantarekin pagatu bere alokairua. Azkenean 2028 arte luzatu dio bere alokatze kontratu justiziak. Anartean beti han bizi da argindar eta urik gabe momentuko baina Donibane lohizuneko herriko etxeak bere gain hartuko ditu hainbat lan eta elektrika eta uraren berriz plantatzea. Musikariak ez du amore eman urte luze hauetan, bere osasun eta aurrezkiak ezarri ditu bataila horretan. Gaur egun protomoreak legezko likidazioan dira. Lekua erosiko duten ondoko jabeekin zentzua duen proiektu bat sortzeko xedearekin da Baptiste d’Aleman.