Larunbat eguerdirako jakin beharko genuke nor izanen den Frantziako Pilota Federakuntzako lehendakari berria. Stéphane Saint Laurent oztibartarraren taldeak, beste norabide bat eman nahi lioke gobernatzeko manerari. Zuzendari orokorraren postua sortu nahi luke, lehendakaria, diruzaina eta idazkariak beste proiektu batzuez okupa daitezen. Pilota elkarte, komite eta ligekin ere hurbiltasun gehiago segurtatu nahi luke, baita komunikazioa hobetu ere. Lilou Etxeberria gaur egungo presidenteak nahi luke laugarren eta azken kargualdi batentzat hautatua izan, trantsizioa segurtatzeko. Paleta pilota goma beteko nazioarteko lehiaketa sortu nahi luke, joko horrek baitu lizentziadun kopuru handiena, baita azken urteetan abiatu dituen proiektuei segida eman ere.

«Argizko idazkun digitalak debekatu». Aturri aldeko Stop Pub kolektiboak bederatzi proposamen plazaratu ditu, Tokiko Publizitatearen Araudia eztabaidan delarik momentu honetan. Euskal Hirigune Elkargoko hautetsiek adostu behar duten araudia da, 2026an bozkatuko dutena. Kolektiboak publizitaterik gabeko eremu babestuak eskatzen ditu, hainbat lekutan argidun iragarkiak debekatzea edota iragarki taulen izaria mugatzea. Publizitatearen araudia osatzeko kontzertazio fasean dira hautetsiak. Kolektiboak aukera izan du bere proposamenak aurkezteko tailerren bidez. 2026an bozkatu beharra dute araudia elkargoko hautetsiek.

Frantses gobernuaren kontrako zentsura mozioaren biharamunean, funtzio publikoko langileek Baionako karrikak bete dituzte. Untsalaz, Barnier lehen ministro oiharen neurriak salatzea zen xedea; besteak beste eritasun geldialdian hiru eguneko lansari gabezia. Lehen ministroaren dimisioarekin, lege proiektua ere ez da gehiago aktualitatean. Sindikatuek erabaki dute mantentzea greba mugimendua, arlo publikoaren zailtasunak argitan emateko.

Michel Barnierren kontrako zentsura mozioa onartu du asteazken gauean. 331 diputatuk  egin dute ezkerraren zentsura mozioaren alde, horien artean Iparraldeko hiru diputatuak, eta RN Batasun Nazionaleko diputatu ultraeskuindarrak. Bazuen 60 urte zentsura moziorik ez zela onarturik izan. Orain, Emmanuel Macron presidenteak Fronte Popularraren edo eskuin muturraren gustuko lehen ministro berri bat izendatu beharko du, beste zentsura mozio bat saihestu nahi badu. Peio Dufau legebiltzarkide abertzalearen iritziz, zentsura mozioa «ez da erabateko garaipena izan» eskuin muturraren babesa behar izan baitute, eta «egoeraren ardura» hartzen dute. Haren ustez, Macronek «egiteko moldeak aldatu beharko ditu» legegintzaldiarekin aitzina segitzeko.

Frantses gobernuaren erorketa ez dute begi onez hartu, bistan dena, eskuin kontserbadoreko ordezkariek. Beñat Cachenaut Errepublikanoen laugarren hautesbarrutiko diputatugaiak «bi muturren batasuna» ikusi du zentsura mozio horren oinarrian. Frantzia «krisian» ikusten du, eta ez du segurtamenik ikusten ondoko garaiendako. Haren ustez, Barnierren gobernuak 49.3 artikuluaren bidez onartarazi nahi zituen aurrekontuak baitezpadakoak ziren, Frantziako estatuak duen zorra murrizteko.

Durangoko azokan aurkeztuko diren Iparraldeko berritasunen artean, Ekaitz Bergaretxeren liburua atzeman daiteke. 'Masusta erreximenta – Abertzale baten bizipenak' liburua argitaratu berri du. Azaltzen duenez, bere bizipen bidez herri zapaldu baten sasiko bizia islatu nahi izan du, herritar xume baten ikuspegitik eta itzaleko borrokalariak argitan emateko. Euskal Herriaren iragana hurbiletik ezagutzeko eta oraina hobeki ulertzeko xedez idatzi du liburua Bergaretxek.

Durangoko Azokako erakusmahaiek 933 berritasun izanen dituzte aurten, hauetan 50 Ipar Euskal Herritik. Abenduaren 5etik 8ra iraganen da 59. azoka, eta iaz baino hamazazpi erakusmahai gehiago izanen dira, hots, 270 baino gehiago. Iparraldetik 32 liburu eta hamabost disko aurkeztuko dira, hauetan Kuartzen azken lana, Mattin Lerissarena edota Maider Zigarroarena. Argitalpenen aldetik Ixabel Etxeberriren haur liburuak edo Ekaitz Bergaretxeren 'Masusta Erreximenta'. Gazteei dei berezia egin nahi die azokak eta haiei zuzendu eguna izango da abenduaren 6koa. Euskal herri osotik 50 ikastetxek ere eginen dute bisita.

Euskal Hirigune Elkargoaren garraio publikoaren sindikatuak Xiberoako konexioak azkartuko ditu. Donibane Garazi eta Atharratze arteko bi linea berri ezarriko dituzte, udako sasoian, Iratiraino helduko dena. 2025ean, gainera, Sohüta eta Garazi lotuko dituen linea berria entseatuko dute. Horrez gain, azken urteetan ukan duen harrera ona dela eta, Atharratze eta Baiona arteko hamaikagarren linea hobetzeko neurriak hartuko dituzte, hala nola, aste barneko maiztasunak handitzea eta asteburuetako zerbitzua irekitzea.

Iker Elosegi hazpandarrak 'Euskal Herriko Fauna Gida' liburua aurkeztu du. Liburu horren xedea lurralde txiki honetan bizi diren animalia basekiko jakin-mina piztea da. Horretarako naturazale jarrera hartzea proposatzen du. Orotara, 150etik gora animalia aipatzen baditu ere, liburua ez da espezie katalogo bat. Animalia horien gaineko jakintza zabaltzera, beste espezie batzuk ezagutzeko gogoa piztera eta bizi garen ingurumena hobeki ulertzeko gakoak ematera dator.

Euskal Herritik Ameriketara jauzi eginen du zesta puntako Jai Alai Ligak. Hamabi pilotalekutan jokatuko dira partidak Euskal Herrian, Pauen eta Floridako Danian. Zortzi slam, hamazazpi master eta bost sailkapen proba izanen ditu aurtengo ligak eta puntuazio sistema ere aldatuko dute. Preseski, Byscaine Cup izeneko masterra Dania Jai Alai frontoi historikoan jokatuko dute, otsailaren 20tik 22ra. Pilotari bakoitzak gehienezko txapelketa kopuru bat izanen du, sailkapena proportzionalagoa izan dadin. Otsailean hasiko dira sailkapen probak.