Maule Lextarreko auzapezak finantzen kudeaketa osoki asumitzen du. Herriko kontuak oso gaizki dira eskualdeko kontu ganberaren arabera. Bost milioi euroko zorretan da herria, hogei bat mailegu bidean dituelarik. Bestalde, eskualdeko kontulariek 2023an egin bisitatik hainbat kezka agerrarazi dituzte; hala nola gastuen kudeaketa txarra, eta arriskuen gaizki menperatzea. Auzapezak erran digunez, bazekien kontuak tinko zirela, baina inbertsioen egitea erabaki zuten halere. Louis Labadot auzapezak herriko kontseiluan emanen ditu argibideak, martxoaren 31an.

Helegitea ezarriko dio Miarritzeko herriko etxeak, La Negresse auzoaren izenaren aldaketa galdegiten duen epaiari. Administrazio Auzitegiaren deliberoa gibelera botatzeko, auzoari izena eman zion herriko etxeko erabakia ez dela existitzen argudiatzen dute. Mémoires et Partages elkarteak leku-izen horren izaera arrazista eman zuen agerian, eta auzitegietara jo zuen 1861ean auzoari izena emateko herriko etxeak hartu zuen deliberoa bertan behera uzteko. Otsailaren 6an Bordeleko administrazio auzitegiak izendapena aldatzeko hiru hilabete zituela jakinarazi zuen. Haatik, Maider Aroztegi Miarritzeko auzapezak, herriko etxeko erabaki hori ez dela existitzen dio. Xarles Bidegain euskaltzainak historialarien batzordean parte hartu du.

Donibane Lohizuneko portu ondoan, Foch gunearen urbanizazio proiektua amaitzera doa, hiru urteko obren eta polemiken ondotik. Hiri sarrera berrantolatzeko eta lur azpiko aparkalekua nahiz bizitegi eta merkataritza-guneak eraikitzeko helburua du, baina hasieratik eztabaida piztu du. Herri Berri oposizioko taldeak plazaren izaera harritsua eta landare eskasia salatu zuen sare sozialetan. Orain, Herriko Etxeak plaza estreinatuko du Martxoaren 22an, eta Jean-François Irigoyen auzapezak nabarmendu du oposizioaren oharrak kontuan hartzen saiatu direla. Hala ere, oposizioak berriz azpimarratu duenez, plazak herritarrentzako bizi eremuak eskas ditu, hala nola, parke bat edo pilota plaza bat.

Departamenduko tuberkulosia taldeak elkarretaratzea deitu du Donapaleun astearte honetan. Tuberkulosiaz hunkiak diren Xiberoako hamaika etxaldeek kolektibo bat sortu dute 'Collectif tuberculose du 64' izenpean, eta protokolo esperimental baten proposamenak aitzinatu dituzte. Bestalde Frantziako gobernuaren laguntzak galdetzen dituzte biosegurtasunaren plantan ezartzeko, desinfekzioa egiteko eta mozkinen galtzearen konpentsatzeko. Aldi honetan, Donapaleun mobilizatuko dira GDS Osasun Defentsarako Elkartearen biltzar nagusiaren karietara. Izan ere, laborariek salatzen dute GDS administrazioarekin eskuz esku ari dela.

1950 eta 2010 urteen artean eginiko abusuen karira 152 plenta aurkeztu dira orain arte Betherrameko kongregazioaren kontra. Alain Esquerre, Betharrameko biktimen bozeramailea martxoaren 20an errezibituko du Elisabeth Borne hezkuntza ministroak, eta aldiz, Bordeleko errektoretzako zerbitzuek inspekzio bat eginen dute kongregazioan. Laurent Bacho Betharramisten eskualdeko bikario ohia eta gaur egun kongregazioko bozeramaileak adierazi duenez, kongregazioa gertatutakoaz «arduradun» sentitzen da. Bere hitzetan, ez lukete «deus gorde», eta «ez ziren jakinean» ikastetxean gertatzen zenaz, eta erreparazio batzordea antolatze.

28 urte baizik ez ditu Joana Halzuet urruñarrak eta iaz estropada guziak eraman zituen Donostiako Arraun Lagunak elkarteko patroitzat hautatu dute. Duela bi urte, Euskotren liga eta Kontxa irabazi zituen talde horrekin, arraunlari gisa. Pausa baten ondotik, joan den urrian, Arraun Lagunak elkarteko buruzagien proposamena onartu zuen azken urteetako ekipo hoberena zuzentzeko. Maila horren atxikitzea dute helburutzat aurten ere.

Ubelez beztitu dira Baionako karrikak larunbatean. «Faxismoaren kontra, ausardia eta aliantza feministak» lelopean abiatu da Martxoaren 8ko deialdi feminista, geltokitik. Azken urteetan Baionan izan den martxoak 8ko mobilizazio jendetsuenetakoa izan da aurtengoa, 1.400 pertsona inguru elkartu direlarik. Faxismoaren aitzinean erantzun transfeminista antolatu behar dela aldarrikatu dute antolatzaileek manifestazioa hasi aitzin. Larzabaleko elkarretaratzean 100 bat pertsona ziren eta Itaia emazteen antolakunde sozialistak bi hitzordu egin zituen Donibane Garazin eta Baionan «Matxismoaren aitzinean, emazte langileak borrokara» lemapean.

Baiona:
Xiberoa:

Bidasoa:

Larunbatean, martxoaren 8an, Urruñako herriak Daniela Albizu izena ezarri dio herriko etxearen aitzineko plazari, emazte abertzale honen memoria omentzeko. Albizu izan zen Urruñako herriko etxean hautetsi gisa sartu zen lehen emazte abertzalea, eta bere bizitza euskararen, euskal kulturaren eta justiziaren aldeko borrokari eskaini zion. Bere izena herritarren bihotzetan egon da beti, eta orain, espazio publiko batean ere izango du leku. Daniela Albizu ez zen irakaslea eta ekintzailea soilik; euskal kulturaren zutabeetako bat izan zen.

Arabako Dupla taldeak ezarri dio doinua aurtengo Herri Urratsi. 'Elgarrekin' kantuaren bideoklipa aurkeztu berri dute, eta aldi honetan, Pisoo raplariaz gain, Pantxoa eta Peio bikotearen parte hartzea ukan dute. Maiatzaren 11an ospatuko da Ipar Euskal Herriko ikastolen besta handia, Senpereko kolegioaren bigarren zatia eriki eta duela hilabete batzuk kiskali zen Arberoako ikastolaren eraikin berria altxatzeko. Kantua aurkeztu aitzinetik jada, Seaskak 'Erlezain' diru-biltze kanpaina abiatu zuen, Euskal Herri mailan 5.000 erlezain biltzeko eta Seaskaren komunitatea babesteko xedez.