Benito Lertxundik 60 urteko kantugintza utziko duela jakinarazi du Durangoko azokaren aurretik. 2023an Gernikan grabatu zuen kontzertu baten diskoarekin amaituko du bere ibilbide luze eta aberatsa. Urteak zeramatzan erabaki hori hartuta, ez baita erraza izan amaiera horren berri ematea publikoki. Orain, askatuta sentitzen da.
Israelek Euskal Herriarekin dituen harreman komertzial, kultural zein diplomatikoak mozteko deia egin du Palestinarekin Elkartasuna kolektiboak. Salatu dutenez, Bizkaian sortu zen BBVA banketxea edota Iparraldean hain azkarra den Credit Agricolek «erantzukizun zuzena» dute palestinarren kontrako genozidioan, urtero miliarka dolarreko inbertsioak egiten baitituzte israeldar industria militarrean. Banketxe bizkaitarrak, erraterako, 1.482 milioi dolar inbertitu ditu Israelgo armagintzan eta Credit Agricolek 6.000 milioi dolar. Iparraldeko industriaren arloan ere, bereziki, Angeluko Dassault eta Hazparneko Lauak multinazionalak seinalatu dituzte.
Europako bozen ondotik, Emmanuel Macronek Frantziako legebiltzarra desegin zuen joan den ekainean, hauteskundeak berriz deituz. Ezkerreko fronte herritarra nagusitu zen, gehiengo osorik gabe. Baina, dimisio pausaturik ere, Gabriel Attalek uda guzia segitu zuen lehen ministro bezala. Ondotik, LR alderdiko Mixel Barnier lehen ministro izendatu zuen Macronek baina zentsura mozioak kanporatu berri du. Orain, François Bayrou lehen ministro berriak, gobernu berria osatu du ministro ohi ainitzekin.
Sokoa eta Hendaia arteko Erlaitzeko errepidea ez dute epe ertainean zerratuko. Hala ere, hemendik hamar urtera ahuleziak jasan litzaketen sei gune kritikotan, gibelatze obrak eginen dira, itsaslabarraren higaduragatik. Haatik, Sokoatik Juantxo kanpalekura doan zatia hetsiko da, leku horretan topografiarengatik ez baita gibelatze lanik egiten ahal. A63 autobidera buruz daraman bidea erabili beharko da. Ziburu eta Hendaiako auzapezek zerratze horren ondorioen aztertzeko ikerketak galdegin dituzte. Eta prefetak eskaera hori onartu du. 2027an egitekoak litzateke aipatutako obrak. Joan den abenduaren 11an bildu zen gidaritza batzordea.
20 milioi euroko defizita aurreikusten du euskal kostako ospitaleak 2025erako. Zilo handia, eta azken urte honetan langileak greban dira behin eta berriz, ekonomiak egiteko lan ordutegia murriztu nahi dielako zuzendaritzak. Azkenean printzipiozko akordio bat lortu dute, bi RTT galduko dituzte baina beste lan baldintzak momentuz atxikitzen dituzte. Akordioa hiru sindikatuk izenpetu dute, CFDT, UNSA eta FOk, CGTk negoziazio mahaia utzi baitzuen. Printzipiozko akordioa da erran bezala, orain izenpetu behar dutena eta ondoko urratsa izanen da sailez sail, ordutegi berriak antolatzea.
Eguberriko merkatu euskaltzalea antolatu du Plazara kolektiboak lehen aldiz. Baionan, ON lokalean muntatua zuten salmenta gunea, finkaturiko data desberdinetan elkarte eta mugimendu ezberdinei irekia, lehen bilana baikorra da. Etxepare lizeoko ikasleekin egin dute prestakuntza eta horietarik bik haiekin lanean segituko dute oraindik bi hilabetez, eta bestalde Gipuzkoatik ere etorri dira hainbat saltzaile, beraz muga gainditu duela erran daiteke. Emaitza baikorra izanik, prest dira heldu den urtean ere berriz antolatzeko.
Pozten da Max Brisson diputatua, Frantziako gobernua berriz osatzea lortu baitu François Bayrou lehen ministroak. Alde batera utziak ziren dosier garrantzitsuak berriz eztabaidatzen hasiko direla espero du eta behin eta berriz aipatu du laborantzaren gaia, lurralde honetako eskaera nagusietarik bat dena. Begi onez ikusten du Brissonek bere hurbilekoak gobernuan izateaz, erraterako, Annie Genevard laborantzan, Bruno Retailleau barne ministerioan, eta Philippe Tabarot garraioan. Aldiz, beste hautu batzuekin dudak erakutsi ditu, bereziki, Manuel Valls lehen ministro ohia itsasoz haraindiko lurraldeen ministro izendatzearekin
Berri txarra Garaziko Mendi Elkargoko hazleendako. Iaz bezala, DDTM Lurraldearen eta Itsasoaren Departamendu Zuzendaritzak jakinarazi die eremu horretako laborarier, NPB laguntzen beha egon beharko direla aurten ere. Arrazoia da arazo teknikoak ukan dituela DDTMak eta ez dakiela noiz konponduko dituen. Untsalaz, garai honetan, sartu behar den diru laguntza horren arabera kalkulatzen dute urteko aintzikontua laborariek. Egoera hori onartezina dela dio ELB sindikatuak, zailtasun teknikoek egoera prekario hori sor dezaten salatuz.
Benito Lertxundi 60 urte iraun duen kantugintza uzten zuela jakinarazi du Durangoko azoka aitzin. 2023an Gernikan grabatu zuen kontzertu baten diskoarekin bururatzen du bere ibilbide handia bezain aberatsa. Bazuen urtea hartua zuela erabakia, ez bada erraza izan bururatze horren berri ematea publikoki, orain libraturik sentitu dugu.
